Màuru Pili, nàschidu in Carbonia su 16 de santugaine de su 1966, est su candidadu de sa “Coalitzione de su pòpulu sardu”. Ultres a su partidu suo, est a nàrrere Unidos, nde faghent parte sas listas Fortza Paris, Soberania e Mauro Pili presidente. Sìndigu de Igrèsias dae su 1993 a su 1999, Pili est istadu Presidente de sa Regione dae su 9 de austu a su 20 de santugaine de su 1999 e dae su 13 de santandria de su 2001 a su 7 de austu de su 2003. Eletu deputadu in su 2006 cun Forza Italia e in su 2013 cun su Pdl, abarrat in sa Càmera ma a pustis de àere lassadu cussu partidu.

Proponet una “rivolutzione sarda” e de barigare sas làcanas de sa destra e de sa manca. «In custos ùrtimos deghe annos – leghimus in su situ internet suo - sas esperièntzias de su tzentru manca e de su tzentru destra sunt resurtadas fallimentares suta ogni puntu de annotu ultres chi sutapostas a sos poderes mannos e a sas segreterias italianas de sos partidos».
In sos primos ses meses – s'incasu bincat sas eletziones – proponet chimbe atziones de fundamentu: bolos a preju bassu in totu sa Sardigna e turismu pro totu s'annu in albergos, albergos difusos, e agriturismos; recuperare sas minieras betzas, sos fàbricos militares, e sas domos abbandonadas in sas biddas e in sas tzitades pro acumprire unu grandu pranu de rivalorizatzione urbanìstica e architetònica; acabbare totus sos traballos in sos cantieris abertos; pònnere in òpera su prus mannu pranu pro sas campagnas e sas forestas de Sardigna; reduire sa burocratzia.