In belle totu sas comunas de sa provìntzia de Nùgoro s'Istitutu de Istùdios e de Chircas Camillu Bellieni de Tàtari a contu de s'amministratzione provintziale de Nùgoro at ammaniadu unu progetu de atividades culturales e de promotzione linguìstica finantziadas cun sa lege regionale 6/2012 art. 4 comma 40. 

Sas atividades chi in custas dies si sunt acumprende in sas 52 comunas sunt duas: unu laboratòriu de duas oras in sardu pro sos pitzinnos de chimbe annos in pare cun sas mammas e/o sos babbos issoro chi si faghet in un'addòbiu ebbia in s'iscola e unu cursu de limba sarda pro sos mannos de  batoro oras  partzidas in duos addòbios in sos locales postos a disponimentu in cada Comuna. Sas atividades sunt a incuru de unos cantos operadores de sos servìtzios linguìsticos territoriales de sa Provìntzia e de s'Istitutu.

Sa punna de custas atividades est de dare informatziones craras, pretzisas e fundadas a manera iscientìfica pro su chi pertocat sos profetos de su multilinguismu  e de sensibilizare a sa pràtica fitiana mescamente de sa limba nostra, su sardu, sas famìllias, s'iscola e sos assòtzios. Unu disafiu mannu est cussu de nche irraighinare unos cantos istereòtipos chi pertocant s'impreu de sa limba sarda cun sos pitzinnos minores. A pesare sos pipos in Sardu est unu profetu mannu pro issos e totu e pro su benidore: sos pitzinnos pesados cun duas o prus limbas sunt sena duda peruna prus abbistos, peri a parre de pedagogistas e espertos de sa psicologia de s'edade evolutiva.

Sas atividades pro sos mannos in prus punnant a acrarire a manera ladina sas normas ortogràficas de referèntzia pro sa limba sarda iscrita (LSC) e de mentovare e dislindare totu sos profetos de s'adotzione de unu istandard linguìsticu bonu cun atentu peri a totu su materiale in sardu produidu in custos annos (libros pro mannos e pitzinnos, dvd didàticos, rivistas). Su disafiu prus mannu e de prus importu pro sos espertos est cussu de cumbìnchere sa gente a pensare a su Sardu che limba normale e europea, cosa chi in su sentidu de cada unu giai s'agat, ma bortas meda no est iscumbatadu in sa pràtica fitiana.