Michela Mùrgia est s'ùnica candidada fèmina de custas eletziones. Ghiat sa coalitzione Sardegna Possibile chi est cumposta dae sos indipendentistas de ProgReS (su partidu suo essidu-nde dae iRS in su 2010) e dae suas listas tzivicas: Gentes e Comunidades.

Nàschida su 3 de làmpadas de su 1972 in Cabras, est nòdida pro àere iscritu unos cantos libros comente “Accabadora”,  su de s'esòrdiu “Il mondo deve sapere” (dae su cale b'ant fatu finas una pellìcula) è àteros. Cun s'ufitzializatzione de sa candidadura sua in su mese de austu de s'annu coladu, Michela Mùrgia at detzisu de si pònnere a dispositzione «conca a realidades chi non sunt indipendentistas ma chi no escludent su protzessu de autodeterminatzione». S'indipendèntzia est pro issa «una summa de libertades conchistadas».

Su programma de Sardegna Possibile agatat sos fundamentos in unos cantos cuntzetos-crae: protzessos de innovatzione; impostatzione de unu modellu de economia collaborativa; assuntzione istitutzionale de su mètodu de sa democratzia partetzipada; pianificatzione integrada de sas polìticas econòmicas; atzione ùnica regionale de re-cunversione de cumpetèntzias e atividades; reconnoschimentu e valorizatzione de sos benes comunes materiales e immateriales.
Paris a su Fiu e a su Movimentu Zona Franca, sas listas de Sardegna Possibile ant dèvidu collire sas firmas pro si pòdere bìdere in sas ischedas eletorales.