Giuanne Frantziscu Zola est s'allenadore nou de su Casteddu! Totus sos sardos si nde cuntentant isperende chi, cun s'annu chi est a proa a comintzare, s'iscuadra nostra torret a bìnchere finas a conchistare sos chirros prus artos de sa classìfica.

Ma cun Zola sa Sardigna intrea podet lòmpere a àteros resurtados. A comintzare dae s'afortiamentu de sa limba nostra.

Pro mèdiu de custa pàgina li pedimus, cun amore e a discansu, de s'indiritzare in sardu a sos giornalistas sardos cando l'intervistant in italianu. Pensamus, si isse cheret, chi sos traballadores de s'informatzione no apant dificultade a cumprèndere sa faeddada ulianesa, e pensamus chi, a bellu a bellu, finas issos potzant fàghere sas pregontas in sardu.

Diat èssere cosa bona a nch'intrare mègius su sardu in sa televisione e in sos àteros mèdios de comunicatzione pro mèdiu de unu personàgiu, amadu dae totus sos sardos, che a Giuanne Frantziscu Zola.

Tocat a bi creere! E a sustènnere su Casteddu e sa limba sarda comente chi esserent sa matessi cosa!

E tando pone “mi piace” e cumpartzi sa pàgina!